• 10 గంటల సమయానికి 65.39 వద్ద ట్రేడింగ్‌

భూగోళిక రాజకీయ ఉద్రిక్తతలు, వాణిజ్య యుద్ధం నేపథ్యంలో డాలర్‌తో రూపాయి మారకం విలువ సోమవారం ఉదయం నష్టాలతో మొదలయ్యింది. ఫారెక్స్ మార్కెట్‌లో 9 గంటల 15 నిమిషాల సమయానికి రూపాయి విలువ 20 పైసలు కోల్పోయి 65.38 దగ్గర ప్రారంభమయ్యింది. శుక్రవారం ముగింపు 65.22 కాగా, ఈస్థాయి నుంచి 0.26 శాతం నష్టపోయి ట్రేడింగ్‌ ప్రారంభించింది. భారత కరెన్సీని పొటెన్షియల్‌ కరెన్సీ మ్యానిపులేటర్స్‌ జాబితాలోకి చేరుస్తున్నట్లు అమెరికా ట్రెజరీ విభాగం వెల్లడించడం కూడా రూపాయి విలువపై ఒత్తిడి పెంచినట్లు ఫారెక్స్‌ మార్కెట్‌ నిపుణులు తెలియజేశారు. ఈ చర్య కారణంగా భారత అధికారులు రూపాయి పెరుగుదల సమయంలో నిర్ణయాలను తీసుకునేటప్పుడు కాస్త వెనకడుగుడు వేయవలసిన పరిస్థితి ఏర్పడుతుందని నోమురా వివరించింది. ఈ అంశాలకు తోడు దేశీయ స్టాక్‌ సూచీలు నష్టాల్లో ప్రారంభంకావడం కూడా రూపాయి విలువను కుంగదీశాయని ఫారెక్స్‌ నిపుణులు వెల్లడించారు. ఈ ఏడాదిలో ఇప్పటివరకు రూపాయి మారకం విలువ 2.3 శాతం పతనమయ్యింది.

మధ్యాహ్నం 12.30 సమయానికి టోకు ధరల ద్రవ్యోల్బణం (డబ్ల్యూపీఐ) వెల్లడికానుండగా.. మార్చి నెలకు ఇది 2.47 శాతం ఉండవచ్చని అంచనాలు వెలువడ్డాయి. 10 ఏళ్ల ప్రభుత్వ బాండ్‌ ఈల్డ్‌ 7.413 శాతంగా ఉంది. అంతక్రితం ముగింపు 7.425 శాతంగా నమోదయ్యింది. 

అమెరికా కరెన్సీ బలానికి కొలమానంగా ఉన్న డాలర్‌ ఇండెక్స్‌ క్రితం ముగింపు 89.80 కాగా, 0.09 శాతం నష్టపోయి 89.723 వద్ద ప్రస్తుతం ట్రేడింగ్‌ కొనసాగిస్తోంది.