సోమవారం ముగింపు చార్టుల్లో దాదాపు వందకు పైగా షేర్లు పతనానికి రెడీగా ఉన్న సంకేతాలు చూపాయి. ఇలా కరెక‌్షన్‌కు తయారుగా ఉన్న స్టాకుల్లో ఐసీఐసీఐ బ్యాంక్‌, ఐఓసీ, ఐటీసీ, టాటా మోటర్స్‌, పీవీఆర్‌, ఇన్ఫీ, ఇండియాబుల్స్‌ రియల్‌ ఎస్టేట్‌, భారత్‌ గేర్స్‌, వాడిలాల్‌, మహానగర్‌ గ్యాస్‌ లాంటి దిగ్గజాలున్నాయి. వీటితోపాటు హెచ్‌పీసీఎల్‌, ఈఐఎల్‌, గేట్‌వేడిస్ట్రిపార్క్స్‌, భారతి ఇన్‌ఫ్రాటెల్‌, ఐబీఆర్‌ఎల్‌, వీగార్డ్‌, ఎస్‌జేవీఎన్‌, ఉజ్జీవన్‌, బీఎఫ్‌ యుటిలిటీస్‌ షేర్లలో సైతం నెగిటివ్‌ సంకేతాలు కనిపిస్తున్నాయి. ఈ షేర్ల చార్టుల్లో ఎంఏసీడీ ఇండికేటర్‌ బేరిష్‌ సంకేతాలు ఇచ్చింది. సిగ్నల్‌లైన్‌కు పైన ఎంఏసీడీ లైన్‌ కదలాడితే బుల్లిష్‌గా, ఈ లైన్‌కు దిగువకు వస్తే బేరిష్‌గా చెప్పవచ్చు. ఎంఏసీడీ రెండు లైన్లు ఒకదానినొకటి క్రాస్‌ చేసే విధానాన్ని బట్టి బేరిష్‌ క్రాసింగ్‌, బుల్లిష్‌ క్రాసింగ్‌గా చెబుతారు. ప్రస్తుతం ఈ షేర్ల చార్టుల్లో ఎంఏసీడీ ఇలాంటి బేరిష్‌ క్రాసోవర్‌ ఏర్పరిచింది. అయితే కేవలం ఎంఏసీడీని మాత్రమే కాకుండా ఇన్వెస్టర్లు ఇతర ఇండికేటర్లను సైతం పరిశీలించి నిర్ణయానికి రావాలి.  ప్రస్తుతం నిఫ్టీ సైతం ప్రస్తుతం బేరిష్‌గా ఉందని, త్వరలో 9700- 9800 పాయింట్లకు దిగజారే అవకాశాలున్నాయని నిపుణులు అంచనా వేస్తున్నారు. మరోవైపు 24 స్టాకుల్లో ఎంఏసీడీ బుల్లిష్‌ క్రాసోవర్‌ ఏర్పరిచింది. వీటిలో హెచ్‌యూఎల్‌, తారా జువెల్స్‌, జైపీఇన్‌ఫ్రా, బొడాల్‌ కెమికల్స్‌, హాత్‌వే కేబుల్స్‌, శక్తి సుగర్స్‌ షేర్లున్నాయి.