News

ముంబై: ప్రభుత్వ రంగ సాధారణ బీమా సంస్థలతో పోలిస్తే ప్రైవేట్‌ బీమా సంస్థలు గణనీయ స్థాయిలో వృద్ధి సాధిస్తున్నాయి. 2017–18లో 22 శాతం మేర వృద్ధి నమోదు చేశాయి. అదే సమయంలో ప్రభుత్వ రంగ (పీఎస్‌యూ) సాధారణ బీమా సంస్థలు 13 శాతమే వృద్ధి సాధించాయి. రేటింగ్‌ ఏజెన్సీ ఇక్రా నివేదిక ప్రకారం గత ఆర్థిక సంవత్సరంలో మొత్తం సాధారణ బీమా రంగం 17 శాతం మేర వృద్ధి చెందింది. ప్రైవేట్‌ జనరల్‌ ఇన్సూరెన్స్‌ కంపెనీల మార్కెట్‌ వాటా 53 శాతం నుంచి 55 శాతానికి పెరిగింది. హెల్త్, మోటార్‌ ఇన్సూరెన్స్‌ ప్రీమియంల ఊతంతో ప్రైవేట్‌ సంస్థలు రికవరీకి సారథ్యం వహిస్తున్నాయని ఇక్రా గ్రూప్‌ హెడ్‌ (ఫైనాన్షియల్‌ సెక్టార్‌ రేటింగ్స్‌ విభాగం) కార్తీక్‌ శ్రీనివాసన్‌ తెలిపారు. ప్రైవేట్‌ సాధారణ బీమా సంస్థల పంట బీమా వ్యాపార విభాగం వృద్ధి కూడా కొనసాగుతుందని, అయితే 2016–17 స్థాయిలో ఉండకపోవచ్చని ఆయన వివరించారు. 
    మరోవైపు, అండర్‌రైటింగ్‌ నష్టాలను తగ్గించుకోవడం ద్వారా పీఎస్‌యూ బీమా సంస్థలు వృద్ధిని క్రమబద్ధీకరించుకుంటున్నాయని, దీంతో గత ఆర్థిక సంవత్సరం వాటి వృద్ధి 13 శాతానికి పరిమితమైందని శ్రీనివాసన్‌ చెప్పారు. అగ్ని ప్రమాదాలు, స్థిరాస్తి, మోటార్‌ ఓన్‌ డ్యామేజ్‌ (ఓడీ) విభాగాలు మందగించినట్లు తెలిపారు. అయితే, హెల్త్, మోటార్‌ థర్డ్‌ పార్టీ విభాగాల్లో పీఎస్‌యూ బీమా సంస్థలు గణనీయ వృద్ధి నమోదు చేశాయని పేర్కొన్నారు. 

ప్రైవేట్‌ సంస్థలకు అదనపు మూలధనం..
ప్రస్తుత 17–20 శాతం వృద్ధి రేటును కొనసాగించాలంటే ప్రైవేట్‌ జనరల్‌ ఇన్సూరెన్స్‌ కంపెనీలకు ఈ ఆర్థిక సంవత్సరంలో రూ. 1,200–3,000 కోట్ల మేర మూలధనం అవసరమవుతుందని ఇక్రా పేర్కొంది. అయితే, ప్రస్తుత స్థాయి లాభదాయకత కొనసాగిస్తే రూ. 1,200 కోట్లు సరిపోవచ్చని అంచనా వేసింది. బీమా కంపెనీలు నిధుల సమీకరణకు టయర్‌ 2 బాండ్ల జారీ మార్గాన్ని ఎంచుకునే అవకాశం ఉందని తెలిపింది. బీమా కంపెనీలు ఇప్పటిదాకా ఈ మార్గంలో రూ. 25,800 కోట్ల దాకా సమీకరించినట్లు వివరించింది.