News

న్యూఢిల్లీ: పారిశ్రామిక రంగం జూన్‌లో పరుగు పెట్టింది. సంబంధిత సమీక్షా నెలలో పారిశ్రామిక ఉత్పత్తి సూచీ (ఐఐపీ) వృద్ధి రేటు 7 శాతంగా నమోదయ్యింది. మే నెలలో ఈ రేటు 3.9 శాతంకాగా, 2017 జూన్‌లో వృద్ధి అసలు లేకపోగా, -0.3 శాతం క్షీణత నమోదయ్యింది. సూచీలో దాదాపు 77 శాతంగా ఉన్న తయారీతోపాటు మైనింగ్‌, విద్యుత్‌ రంగాల నుంచి మెరుగైన ఉత్పత్తి జూన్‌లో మంచి వృద్ధి ఫలితానికి దారితీసింది. గణాంకాలు, కార్యక్రమాల అమలు మంత్రిత్వశాఖ శుక్రవారం విడుదల చేసిన గణాంకాల ప్రకారం...
♦  తయారీ: జూన్‌లో ఉత్పత్తి వృద్ధి రేటు 6.9 శాతంగా నమోదయ్యింది. 2017 ఇదే నెలలో ఈ విభాగంలో అసలు వృద్ధిలేకపోగా -0.7 శాతం క్షీణించింది. ఇక ఈ విభాగాన్ని ఏప్రిల్‌ నుంచి జూన్‌ మధ్య చూస్తే వృద్ధిరేటు 1.6 శాతం నుంచి (2017 ఇదే కాలంతో పోల్చి) 6.2 శాతానికి చేరింది.  తయారీ రంగంలోని 23 పారిశ్రామిక గ్రూపుల్లో 19 సానుకూల వృద్ధి తీరును నమోదుచేసుకున్నాయి. 
♦ మైనింగ్‌: జూన్‌లో వృద్ధి రేటు 0.1 శాతం నుంచి 6.6 శాతానికి పెరిగింది. ఏప్రిల్‌-జూన్‌ మధ్య ఈ రేటు 1.1 శాతం నుంచి 5.4 శాతానికి చేరింది. 
♦ విద్యుత్‌: వృద్ధి రేటు 2.1 శాతం నుంచి 8.5 శాతానికి పెరిగింది. అయితే ఏప్రిల్‌-జూన్ మధ్య కాలంలో ఈ రేటు 5.3 శాతం నుంచి 4.9 శాతానికి తగ్గింది. 
♦ క్యాపిటల్‌  గూడ్స్‌: భారీ యంత్రపరికరాల డిమాండ్‌కు సంబంధించిన ఈ విభాగంలో వృద్ధి రేటు 9.6 శాతంగా నమోదయ్యింది. గత ఏడాది ఇదే నెలలో వృద్ధిలేకపోగా -6.1 శాతం క్షీణత నమోదయ్యింది. 
♦ కన్జూమర్‌ డ్యూరబుల్స్‌: -3.5 శాతం క్షీణత భారీగా 13.1 శాతం వృద్ధికి మారింది. 
ఆరునెలల్లో...
ఐఐపీ వృద్ధి రేటు ఏప్రిల్‌-జూన్‌ మధ్య కాలంలో 5.2 శాతంగా నమోదయ్యింది. గత ఏడాది ఇదే కాలంలో ఈ రేటు 1.9 శాతం.