News

మీరు కేంద్ర ప్రభుత్వం నుంచి పెన్షన్‌ తీసుకుంటున్నారా? మీకు పెన్షన్‌కు సంబంధించి ఏమైనా సమస్యలున్నాయా? మీ సమస్యను ఫిర్యాదు చేసినా అది పరిష్కారం కాలేదా? ప్రభుత్వ విభాగం కానీ, బ్యాంక్‌ ఉద్యోగులు కానీ స్పందించడం లేదా? లేకపోతే సమస్యను ఎవరికి తెలియజేయాలో తెలియడం లేదా? అయితే మీరు www.pensionersportal.gov.in వెబ్‌సైట్‌ చూడండి. ఇందులో మీ సమస్యను ఫిర్యాదు చేయవచ్చు. ఇక్కడ మీరు చేసిన ఫిర్యాదు సంబంధిత విభాగానికి చెందిన సీనియర్‌ అధికారులకు వెళుతుంది. అయితే వెబ్‌సైట్‌లో ఫిర్యాదు చేసిన తర్వాత ఎన్ని రోజులకు మీకు పరిష్కారం లభిస్తుందో చెప్పడానికి నిర్ణీత కాలమంటూ ఏమీ లేదు. అయితే మీ సమస్య 60 రోజులైనా పరిష్కారం కాకపోతే.. అప్పుడు సంబంధిత విభాగానికి/మంత్రిత్వ శాఖకు రిమైండర్‌ పంపడానికి వెబ్‌సైట్‌లో ఒక ఆప్షన్‌ అందుబాటులో ఉంది. మీరు సమస్యను ఫిర్యాదు చేసిన తర్వాత దాని స్టేటస్‌ను చూసుకోవచ్చు. ఇందులో మీ సమస్యను పరిశీలించే విభాగం వివరాలు, అధికారి పేరు, వారి కాంటక్ట్‌ సమాచారం, హోదా వంటి సమాచారం అందుబాటులో ఉంటుంది. ఫిర్యాదు పరిష్కారంతో మీరు సంతృప్తి చెందకపోతే మళ్లీ ఫిర్యాదు చేయవచ్చు.