News

ఈ ఏడాది బంగారం, వెండి ర్యాలీ చేస్తాయని కార్వీ గ్రూపులో భాగమైన కార్వీ కన్సల్టెంట్స్‌ అంచనా వేసింది. ఇన్వె‍స్టర్లు తమ పెట్టుబడి నిర్ణయాలపై అవగాహన కల్పించేందుకు ఈ సంస్థ తన 11వ వార్షిక కమోడిటీ అండ్‌ కరెన్సీ రిపోర్ట్‌ 2019ను విడుదల చేసింది. 2017లో బేస్‌ మెటల్స్‌ మంచి ర్యాలీ చేయగా, 2018లో మాత్రం ఈ ట్రెండ్‌ కొనసాగని విషయం తెలిసిందే. దేశీయ రూపాయి విలువ క్షీణించడం మరింత సమస్యాత్మకంగా మారింది. అయితే, ఈ ఏడాది కమోడిటీ మార్కెట్లలో మిశ్రమ ధోరణి ఉంటుందని కార్వీ కన్సల్టెంట్స్‌ అంచనా. 2019లో ఫెడ్‌ నుంచి రెండు సార్లు వడ్డీ రేట్ల పెంపు ఉంటుందని, ఇది బంగారంలో పెట్టుబడులు పెరిగేందుకు దారితీస్తుందని తన నివేదికలో పేర్కొంది.

 
‘‘అంతర్జాతీయంగా ఆర్థిక అనిశ్చితులు ఉన్నందున, సురక్షిత సాధనాల కొనుగోలుకు మొగ్గు చూపడం వల్ల 2019లో బంగారం, వెండి మంచి పనితీరు చూపించే అవకాశం ఉంది. వ్యవసాయ ఉత్పత్తుల ధరలను మాత్రం సరఫరా, డిమాండ్‌, వాతావరణం, కనీస మద్దతు ధరలు, కొనుగోళ్లు, టారిఫ్‌లు, లెవీలు వంటి ప్రభుత్వ విధానాలు నిర్ణయించనున్నాయి. దేశీయ పరిస్థితులే రానున్న సంవత్సరంలోనూ వ్యవసాయ ఉత్పత్తుల ధరలను శాసించనున్నాయి. ఈ అంశాల నేపథ్యంలో... అమెరికా-చైనా వాణిజ్య ఉద్రిక్తతల ప్రభావం ధరల పరంగా మూడో పరిణామం’’ అని కార్వీ స్టాక్‌ బ్రోకింగ్‌ కమోడిటీస్‌, కరెన్సీస్‌ సీఈవో రమేష్‌ వరకేద్కర్‌ తెలిపారు.
 
అంచనాలు...

• 2019లో చమురు ధరలు రోలర్‌కోస్టర్‌ రైడ్‌ మాదిరిగా ఉండొచ్చు. ఒకవైపు ఓపెక్‌, రష్యా ఉత్పత్తికి కోత విధిస్తే, మరోవైపు అమెరికా ఉత్పత్తిని పెంచుతోంది. 
• డిమాండ్‌ తగ్గడంతో కాపర్‌ ధరలు బలహీనంగా ట్రేడ్‌ కావచ్చు. 
• అల్యూమినియం కొన్ని నెలల పాటు ప్రతికూలంగా ఉండొచ్చు. రష్యాలో దిగ్గజ అల్యూమినియం కంపెనీ రూసల్‌ సరఫరా పెంచడమే కారణం.
• సరఫరా పరిస్థితులు కఠినంగా మారడం, ఎగుమతులకు డిమాండ్‌ బలంగా ఉండడంతో కాటన్‌ ధరలు ఈ ఏడాది బలంగా ఉండొచ్చు. 
• సాగు పెరగడంతో ఈ ఏడాది ద్వితీయార్థంలో సోయాబీన్‌కు అమ్మకాల ఒత్తిడి ఉంటుంది.
• జీలకర్ర, గోరుచిక్కుడు ట్రెండ్‌ మొత్తం మీద పాజిటివ్‌గా ఉంటుంది.