News

న్యూఢిల్లీ: భార్య, కుమార్తెలకు ఇచ్చే బహుమతులపై గిఫ్ట్‌ ట్యాక్స్‌ వేయవద్దని కేంద్ర మహిళా, శిశు అభివృద్ధి శాఖా మంత్రి మేనకాగాంధీ కోరారు. ఇందుకు సంబంధించి చట్ట సవరణలు చేసే అంశాన్ని పరిశీలించాలని కేంద్ర ఆర్థిక మంత్రి పీయూష్‌ గోయల్‌కు సూచించారు. ‘‘ఓ సమాజంగా మహిళల ఆర్థిక సాధికారతకు భరోసానివ్వాల్సిన బాధ్యత మనపై ఉంది. ఆదాయపన్ను చట్టంలోని సెక్షన్‌ 64ను తగిన విధంగా సవరించడాన్ని పరిశీలించాలని ఆర్థిక మంత్రిని కోరుతున్నాను’’ అని మేనకాగాంధీ ట్వీట్‌ చేశారు. సెక్షన్‌ 64 ప్రకారం భర్త తన భార్యకు ఏదైనా ఆస్తి బహుమతిగా ఇస్తే, దానిపై వచ్చే ఆదాయాన్ని భర్త ఆదాయంగానే పరిగణించడం జరుగుతుంది. భార్యకు బహమతిగా ఇచ్చినా, పన్ను భారం మోయాల్సి ఉంటుంది. ‘‘1960ల్లో భార్య, కుమార్తెలకు స్వతంగా పన్ను వర్తించే ఆదాయం ఉండదన్న భావనతో ఈ నిబంధనను రూపొందించారు. కానీ, ఆర్థికంగా స్వతంత్రులవుతున్న నేటి రోజుల్లో ఈ నిబంధన వారిపై ఎంతో ప్రభావం చూపిస్తోంది. భర్తలు, మామ స్థానంలో ఉన్న వారు తమ కుటుంబంలో మహిళలకు ఆస్తులను బదలాయించేందుకు వెనుకాడుతున్నారు. ఆ ఆస్తుల ద్వారా వచ్చే ఆదాయంపై పన్ను భారం తమపైనే పడుతుందన్న భయం వారిలో ఉంది’’ అని మేనకాగాంధీ ట్వీట్‌ చేశారు.