News

న్యూఢిల్లీ: దేశీ ఆటోమొబైల్ దిగ్గజం టాటా మోటర్స్‌లో భాగమైన జాగ్వార్ ల్యాండ్‌ రోవర్‌ (జేఎల్‌ఆర్‌) .. ఉత్పత్తి కార్యకలాపాల క్రమబద్ధీకరణపై దృష్టి పెట్టింది. దీంతో సెంట్రల్ ఇంగ్లండ్‌లోని వోల్వర్‌హాంప్టన్‌ ప్లాంటులో సుమారు 250 మంది తాత్కాలిక ఉద్యోగులను తొలగించనుంది. డిసెంబర్‌లో రెండు వారాల పాటు ఈ ప్లాంటులో ఉత్పత్తిని నిలిపివేయనున్నట్లు కూడా జేఎల్‌ఆర్‌ తెలిపింది. దీంతో 500 మంది ఉద్యోగులు రోజువారీ విధులకు హాజరు కానక్కర్లేదని, అయితే ఈ వ్యవధిలో వారి జీతభత్యాలు యథాప్రకారం చెల్లిస్తామని వివరించింది. అంతర్జాతీయంగా పరిస్థితులు సమస్యాత్మకంగా మారుతున్న నేపథ్యంలో దీర్ఘకాలిక ప్రయోజనాలను దృష్టిలో ఉంచుకుని నిర్వహణ సామర్ధ్యాలను మెరుగుపర్చుకునేందుకు చర్యలు తీసుకుంటున్నట్లు జేఎల్‌ఆర్‌ తెలిపింది. విద్యుత్ వాహనాల్లో విస్తృత శ్రేణిని అందుబాటులోకి తెచ్చేందుకు కఠిన నిర్ణయాలు తీసుకుంటున్నామని, వ్యాపార పరిణామ క్రమంలో ఇలాంటివి తప్పవని వివరించింది. అంతర్జాతీయంగా డిమాండ్‌లో హెచ్చుతగ్గులకు తగ్గట్లుగా ఉత్పత్తిలో కూడా మార్పులు, చేర్పులు చేస్తున్నట్లు జేఎల్‌ఆర్‌ పేర్కొంది. వీటివల్ల కస్టమర్ల ఆర్డర్లపై ఎలాంటి ప్రతికూల ప్రభావం పడకుండా జాగ్రత్తలు తీసుకుంటున్నామని తెలిపింది. కీలకమైన యూరప్‌, చైనా మార్కెట్లలో సవాళ్లెదుర్కొంటున్న బ్రిటన్ లగ్జరీ కార్ల తయారీ దిగ్గజం జాగ్వార్ లాండ్‌ రోవర్‌ సంస్థ.. స్లొవేకియాలో 1.4 బిలియన్ యూరోలతో వాహనాల తయారీ ప్లాంట్‌ను ఏర్పాటు చేసింది. వార్షికంగా 1.50 లక్షల కార్ల తయారీ సామర్ధ్యంతో దీన్ని నెలకొల్పింది. తాజా పరిణామాలతో దేశీయంగా బీఎస్‌ఈలో టాటా మోటార్స్‌ షేరు సుమారు 3 శాతం క్షీణించి రూ. 172.20 వద్ద క్లోజయ్యింది.