STOCKS

News


అమెజాన్ పే చేతికి ట్యాప్‌జో

Wednesday 29th August 2018
news_main1535519616.png-19743

న్యూఢిల్లీ: దేశీ డిజిటల్ పేమెంట్స్ మార్కెట్లో అవకాశాలను అందిపుచ్చుకోవడంపై అమెరికన్ రిటైల్ దిగ్గజం అమెజాన్ మరింతగా దృష్టి పెడుతోంది. ఈ క్రమంలో అమెజాన్ పేమెంట్స్ విభాగం అమెజాన్ పే .. బెంగళూరుకు చెందిన స్టార్టప్ సంస్థ ట్యాప్‌జోను కొనుగోలు చేసింది. నగదు, షేర్ల రూపంలో కుదుర్చుకున్న ఈ డీల్‌తో ట్యాప్‌జో విలువను 30- 40 మిలియన్ డాలర్లుగా లెక్కగట్టినట్లు సంబంధిత వర్గాలు తెలియజేశాయి. ట్యాప్‌జో కొనుగోలు కోసం ఈ ఏడాది తొలి నుంచీ అమెజాన్ చర్చలు జరుపుతోంది. డీల్ కింద ట్యాప్‌జో వ్యవస్థాపకుడు అంకుర్ సింగ్లా, ఆయన టీమ్‌ అంతా కూడా అమెజాన్‌లో చేరతారని తెలిసింది. అయితే ఈ డీల్‌ గురించి ఇటు అమెజాన్‌ గానీ అటు ట్యాప్‌జో గానీ ధృవీకరించలేదు. 
2009లో ఫిర్యాదుల పరిష్కార ఫోరంగా అకోషా పేరుతో ట్యాప్‌జో ప్రారంభమైంది. ఆ తర్వాత ఈ సర్వీసును హెల్ప్‌చాట్‌ కింద రీ బ్రాండ్ చేశారు. అది కూడా సత్ఫలితాలు సాధించకపోవడంతో ఆల్‌-ఇన్‌-వన్ ప్లాట్‌ఫాం ట్యాప్‌జో కింద 2016 నవంబర్‌లో మళ్లీ రీబ్రాండింగ్ చేశారు. ఫ్లిప్‌కార్ట్‌, అమెజాన్‌ తదితర 35 పైచిలుకు యాప్స్‌ను విడివిడిగా డౌన్‌లోడ్‌ చేసుకోవాల్సిన అవసరం లేకుండా ఒకే యాప్‌లో ఇది అందిస్తోంది. సెకోయా క్యాపిటల్, అమెరికన్ ఎక్స్‌ప్రెస్ కంపెనీ వంటి ఇన్వెస్టర్ల నుంచి ట్యాప్‌జో ఇప్పటిదాకా 20 మిలియన్ డాలర్ల మేర నిధులు సమీకరించింది. 
అమెజాన్‌ బిల్లు చెల్లింపుల సర్వీసులు..
‍ప్రీపెయిడ్, పోస్ట్‌పెయిడ్ బిల్లులను అమెజాన్ పే వాలెట్ ద్వారా చెల్లించే సదుపాయాన్ని అందుబాటులోకి తెస్తూ అమెజాన్ కొత్త సర్వీసులను ప్రారంభించింది. ఇందుకోసం విద్యుత్‌, మొబైల్‌, బ్రాడ్‌బ్యాండ్‌ తదితర విభాగాల సంస్థలతో చేతులు కలిపింది. గడిచిన రెండేళ్లుగా భారత డిజిటల్ పేమెంట్స్‌ రంగంపై ప్రత్యేకంగా దృష్టి సారిస్తున్న అమెజాన్‌.. ఇప్పటికే పలు స్టార్టప్స్‌లో ఇన్వెస్ట్ చేసింది. ఈ ఏడాదే డిజిటల్ రుణాల సంస్థ క్యాపిటల్ ఫ్లోట్‌లో 22 మిలియన్ డాలర్లు, డిజిటల్ ఇన్సూరెన్స్ స్టార్టప్‌ 'అకో'లో 12 మిలియన్ డాలర్లు పెట్టుబడులు పెట్టింది. డిజిటల్ పేమెంట్ సేవల కంపెనీ పేటీఎం మాతృసంస్థ వన్‌97 కమ్యూనికేషన్స్‌లో ఇన్వెస్ట్‌మెంట్ గురు వారెన్ బఫెట్‌కి చెందిన బెర్క్‌షైర్ హాథ్‌వే 3-4 శాతం వాటాల కోసం రూ. 2,200-రూ. 2,500 కోట్లు ఇన్వెస్ట్ చేస్తున్నట్లు వెల్లడి కాగానే.. ట్యాప్‌జోను అమెజాన్ కొనుగోలు చేసిందన్న వార్తలు రావడం ప్రాధాన్యం సంతరించుకుంది.  



You may be interested

టెక్‌మహీంద్రా ప్రీ-పెయిడ్ కార్డు లైసెన్సు రద్దు

Wednesday 29th August 2018

ముంబై: ప్రీ-పెయిడ్ కార్డుల జారీకి సంబంధించి టెక్‌ మహీంద్రా సంస్థ లైసెన్సును రిజర్వ్ బ్యాంక్ రద్దు చేసింది. సంస్థ స్వచ్ఛందంగా తన లైసెన్సును అప్పగించడంతో ఆర్‌బీఐ ఈ నిర్ణయం తీసుకుంది. దీంతో ఇకపై టెక్‌ మహీంద్రా .. ప్రీ-పెయిడ్ కార్డుల జారీ లావాదేవీల వ్యాపారాన్ని నిర్వహించడానికి ఉండదు. అయితే, ఇప్పటికే జరిపిన లావాదేవీల సెటిల్మెంట్ కోసం కస్టమర్లు లేదా వ్యాపార సంస్థలు రెండేళ్ల వ్యవధిలోగా (2020 ఆగస్టు 27 దాకా)

రాయల్‌ ఎన్‌ఫీల్డ్‌ నుంచి కొత్త బైక్‌

Wednesday 29th August 2018

బెంగళూరు: రాయల్‌ ఎన్‌ఫీల్డ్‌ కంపెనీ కొత్త మోడల్‌ బైక్‌ను మార్కెట్లోకి తెచ్చింది. క్లాసిక్‌ సిగ్నల్స్‌ 350 పేరుతో అందిస్తున్న ఈ బైక్‌  ధర రూ.1,58,861గా (ఎక్స్‌ షోరూమ్‌, బెంగళూరు) నిర్ణయించినట్లు రాయల్‌ ఎన్‌ఫీల్డ్‌  కంపెనీ బిజినెస్‌ హెడ్‌ (ఇండియా) షాజి కోషే చెప్పారు. ఈ కొత్త బైక్‌ రెండు రంగుల్లో లభ్యమవుతుందని చెప్పారాయన. స్టీల్‌ ఇంజిన్‌ గార్డ్స్‌ వంటి 40 ప్రత్యేక యాక్సెసరీలతో ఈ బైక్‌ను అందిస్తున్నామని పేర్కొన్నారు. ఈ

Most from this category