STOCKS

News


హైదరాబాద్‌లో మానవ రహిత విమానాల తయారీ

Saturday 15th December 2018
news_main1544848785.png-22948

హైదరాబాద్‌, బిజినెస్‌ బ్యూరో: ఏరోస్పేస్‌, డిఫెన్స్‌ రంగంలో భాగ్యనగరం సిగలో మరో కలికితురాయి చేరింది. మానవ రహిత విమానాల (యూఏవీ) తయారీకి హైదరాబాద్‌ కేంద్రం అయింది. విభిన్న రంగాల్లో ఉన్న అదానీ గ్రూప్‌... తన అనుబంధ సంస్థ అదానీ డిఫెన్స్‌ అండ్‌ ఏరోస్పేస్‌ ద్వారా ఈ రంగంలోకి అడుగుపెట్టింది. ఇజ్రాయెల్‌ దిగ్గజం ఎల్బిట్‌ సిస్టమ్స్‌తో కలిసి సంయుక్తంగా శంషాబాద్‌ సమీపంలో 20 ఎకరాల్లో అదానీ ఎల్బి్‌ట్‌ యూఏవీ కాంప్లెక్స్‌ను ఏర్పాటు చేసింది. ఇక్కడ హెర్మెస్‌ 900 యూఏవీలను రూపొందిస్తారు. వీటిని భారత్‌తోపాటు వివిధ దేశాల్లోని ఎల్బిట్‌ కస్టమర్లకు విక్రయిస్తారు. భారత్‌లో ప్రైవేటు రంగంలో అన్‌-మ్యాన్డ్‌ ఏరియల్‌ వెహికిల్స్‌ (యూఏవీ) తయారీకి ఏర్పాటు చేసిన తొలి కేంద్రం ఇది. అలాగే ఎల్బిట్‌ సిస్టమ్స్‌ ఇజ్రాయెల్‌ వెలుపల ఏర్పాటు చేసిన ఉత్పత్తి కేంద్రం కూడా ఇదే. అదానీ ఏరోస్పేస్‌ పార్క్‌ సైతం ఇక్కడ కొలువుదీరింది. అదానీ, ఎల్బిట్‌ ప్రతినిధులతో కలిసి శుక్రవారం ఈ రెండు కేంద్రాలను తెలంగాణ హోం శాఖ మంత్రి మొహమ్మద్‌ మహమూద్‌ అలీ ప్రారభించారు. 
ప్రపంచంలో 15 దేశాల్లో..
అత్యాధునిక హెర్మెస్‌ 900 యూఏవీలను ప్రపంచవ్యాప్తంగా 15 దేశాల్లోని సైన్యం నిఘా, ఇంటెల్లిజెన్స్‌ కోసం విజయవంతంగా వినియోగిస్తోంది. 150 యూఏవీల కోసం ఇండియన్‌ ఆర్మీ, నేవీ, ఎయిర్‌ఫోర్స్‌ ఆఫర్‌ చేసిన టెండర్లలో అదానీ ఎల్బిట్‌ల జాయింట్‌ వెంచర్‌ పోటీపడుతోంది. ఇక హైదరాబాద్‌ సెంటర్‌లో తొలి ఉత్పాదన మార్చికల్లా సిద్ధం కానుంది. తొలుత ఏటా నాలుగు వాహనాలను తయారు చేస్తారు. 2020 చివరికల్లా ప్లాంటు సామర్థ్యం ఏడాదికి 18 వెహికిల్స్‌ స్థాయికి చేరనుందని అదానీ డిఫెన్స్‌, ఏరోస్పేస్‌ హెడ్‌ ఆశిష్‌ రాజవంశీ మీడియాకు వెల్లడించారు. కాంప్లెక్సులో 110 మంది ఇంజనీర్లు, టెక్నికల్‌ సిబ్బంది పనిచేస్తున్నట్టు చెప్పారు. ట్రైనింగ్‌, ఆర్‌అండ్‌డీ సెంటర్‌ స్థాపిస్తున్నామని, పరిశ్రమకు అవసరమైన మానవ వనరులకు ఇక్కడ శిక్షణ ఇస్తామని వివరించారు. 2019 సెప్టెంబరు నుంచి హెలికాప్టర్ల గేర్స్‌ ట్రాన్స్‌మిషన్‌ సిస్టమ్స్‌ తయారు చేస్తామన్నారు. హైదరాబాద్‌ సెంటర్‌కు సుమారు రూ.100 కోట్లు ఖర్చు చేసినట్టు ఎల్బిట్‌ సిస్టమ్స్‌ ప్రెసిడెంట్‌ బెజలెల్‌ మెషిలిస్‌ వెల్లడించారు. 



You may be interested

హైదరాబాద్‌లో 1,585 లగ్జరీ గృహాలు

Saturday 15th December 2018

సాక్షి, హైదరాబాద్‌: ఈ ఏడాది దేశంలో మొత్తం 12,090 లగ్జరీ గృహాలు ప్రారంభమయ్యాయి. రూ.1.5 కోట్ల కంటే ఎక్కువ ధర ఉన్న లగ్జరీ గృహాలు హైదరాబాద్‌లో 1,585 వరకుంటాయి. ఈ ఏడాది మూడు త్రైమాసికాల్లో కలిపి అత్యధికంగా ముంబైలో 6,310 లగ్జరీ గృహాలు ప్రారంభమయ్యాయి. ఇక, మిగిలిన నగరాల్లో చూస్తే.. ఎన్‌సీఆర్‌లో 2,650, కోల్‌కత్తాలో 160, పుణెలో 100 లగ్జరీ గృహాలు ప్రారంభమయ్యాయని అనరాక్‌ ప్రాపర్టీ కన్సల్టెంట్స్‌ తెలిపింది. – న్యూ వరల్డ్‌

జిల్లాల్లోనూ సీఎన్‌జీ స్టేషన్లు!

Saturday 15th December 2018

హైదరాబాద్, బిజినెస్‌ బ్యూరో: ప్రస్తుతం హైదరాబాద్‌కు మాత్రమే పరిమితమైన కంప్రెస్డ్‌ నేచురల్‌ గ్యాస్‌ (సీఎన్‌జీ) స్టేషన్లు వివిధ జిల్లాల్లో కూడా ఏర్పాటు కానున్నాయి. వచ్చే మార్చి నాటికి హైదరాబాద్‌లో కొత్తగా 25, వరంగల్, కరీంనగర్‌ వంటి జిల్లాల్లో 15 స్టేషన్లను ఏర్పాటు చేయనున్నట్లు ఆయిల్‌ ఇండస్ట్రీ తెలంగాణ స్టేట్‌ లెవల్‌ కో–ఆర్డినేటర్‌ టి.రాజేశ్‌ ‘సాక్షి బిజినెస్‌ బ్యూరో’కు తెలిపారు. ఒక్క సీఎన్‌జీ స్టేషన్‌ ఏర్పాటుకు రూ.30 లక్షల వరకు ఖర్చవుతుందని...

Most from this category