News

అమెరికా మార్కెట్లు నాల్గవ త్రైమాసికానికి శభారంభాన్ని ఇచ్చాయి. నాస్‌డాక్‌ మినహా మిగతా రెండు ప్రధాన ఇండెక్స్‌లు సోమవారం లాభాల్లోనే ముగిశాయి. అమెరికా, కెనడా ట్రేడ్‌ డీల్‌ సానుకూల ప్రభావం చూపింది. నాస్‌డాక్‌ ఇండెక్స్‌ స్వల్పంగా నష్టపోతే.. డౌజోన్స్‌, ఎస్‌అండ్‌పీ 500 ఇండెక్స్‌లు లాభపడ్డాయి. డౌజోన్స్‌ ఇండస్ట్రీయల్‌ యావరేజ్‌ 192 పాయిం‍ట్ల లాభంతో 26,651 పాయింట్ల వద్ద ముగిసింది. చెవ్రాన్‌, బోయింగ్‌ ఔట్‌పర్ఫార్మ్‌ చేశాయి. ఇక ఎనర్జీ, మెటీరియల్స్‌, ఇండస్ట్రీయల్‌ షేర్లు లాభపడటంతో ఎస్‌అండ్‌పీ 500.. 11 పాయింట్ల లాభంతో 2,925 పాయింట్ల వద్ద క్లోజయ్యింది. అయితే ఫేస్‌బుక్‌, ఇంటెక్స్‌ షేర్లు నష్టపోవడంతో నాస్‌డాక్‌ కంపొసిట్‌ 9 పాయింట్ల నష్టంతో 8,037 పాయింట్ల వద్ద ముగిసింది. మెక్సికో, అమెరికా, కెనడా దేశాలు నాఫ్తా స్థానంలో కొత్త వాణిజ్య భాగస్వామ్యానికి కుదర్చుకున్నాయి. ఈ కొత్త డీల్‌ పేరు యునైటెడ్‌ స్టేట్స్‌-మెక్సికో-కెనడా అగ్రిమెంట్‌. అలాగే జనరల్‌ ఎలక్ట్రిక్‌ సీఈవో జాన్‌ ఫ్లానరీ పదవీ నుంచి వైదొలగడం, టెస్లా సీఈవో ఎలాన్‌ మాస్క్‌, ఎస్‌సీఈ (సెక్యూరిటీస్‌ అండ్‌ ఎక్ఛ్సేంజ్‌ కమిషన్‌) మధ్య డీల్‌ కుదరడం వంటి అంశాలు కూడా మార్కెట్లపై సానుకూల ప్రభావం చూపాయి. జనరల్‌ ఎలక్ట్రిక్‌ షేర్లు 7 శాతం మేర పెరిగాయి. టెస్లా షేరు​ ఏకంగా 17 శాతంమేర ర్యాలీ చేసింది. జనరల్‌ ఎలక్ట్రిక్‌ మార్కెట్‌ వ్యాల్యు గత వారంలో 100 బిలియన్‌ డాలర్ల దిగువకు పడిపోయింది. ఇలా జరగడం గత తొమ్మిదేళ్లలో ఇదే తొలిసారి. డౌజోన్స్‌ ఇండస్ట్రీయల్‌ యావరేజ్‌ నుంచి ఈ కంపెనీ జూన్‌లోనే స్థానం కోల్పోయిన విషయం తెలిసిందే.