News

ముంబై:- దేశీయ కార్పొరేట్‌ దిగ్గజం రిలయన్స్‌ ఇండస్ట్రీస్‌ లిమిటెడ్‌ షేరు బుధవారం మరో కొత్త గరిష్టాన్ని నమోదు చేసింది. ఈరోస్‌ ఇంటర్నేషనల్‌లో 5 శాతం వాటాను కొనుగోలు చేయడంతో నేడు ట్రేడింగ్‌ ప్రారంభంలో రిలయన్స్‌ 1శాతం వరకు ర్యాలీ చేసింది. అన్ని అనుమతులు పొందిన అనంతరం తమ సంస్థలో రిలయన్స్‌ ఇండస్ట్రీస్‌ 5 శాతం వాటా కొనుగోలు పూర్తయ్యిందని ఎంటర్‌టైన్‌మెంట్‌ సంస్థ ఈరోస్‌ ఇంటర్నేషనల్‌ స్టాక్‌ ఎక్చ్సేంజ్‌లకు సమాచారం ఇచ్చింది.  ఈరోస్‌ నుంచి రిలయన్స్‌ 31,11,088 'ఏ' రకం సాధారణ షేర్లను కొనుగోలు చేసింది. కంపెనీలో ఆ వాటాల పరిమాణం 5 శాతం. ఇందుకు గాను రిలయన్స్‌ ఒక్కో షేరుకు 15 డాలర్ల చొప్పున మొత్తం 46.6 మిలియన్‌ డాలర్లు చెల్లించింది. ఈ లావాదేవీ వ్యవహారంలో గోల్డ్‌మన్‌ శాక్స్‌ ఈరోస్‌కు ప్రత్యేక ఆర్థిక సలహాదారుగా వ్యవహరించింది. నేడు బీఎస్‌ఈలో రిలయన్స్‌ షేరు రూ.1188.40ల వద్ద ట్రేడింగ్‌ను ప్రారంభించింది. కొనుగోలు వార్తలు వెలుగులోకి రావడంతో 2.06 శాతం లాభపడి రూ.1208.00 వద్ద కొత్త గరిష్టాన్ని నమోదు చేసింది. మధ్యాహ్నం గం.1:45ని.లకు షేరు గత ముగింపు ధర(రూ.1183.55)తో పోలిస్తే 1.81 శాతం లాభపడి రూ.1205.00 వద్ద ట్రేడ్‌ అవుతోంది. షేరు ఏడాది కనిష్ట, గరిష్ట ధరలు వరుసగా రూ.760.53లు, రూ.1128.75లుగా నమోదయ్యాయి. సూచీల్లో రిలయన్స్‌ ఇండస్ట్రీస్‌ షేరు హెవీ వెయిట్‌ షేరు కావడంతో నేడు సెన్సెక్స్‌ సూచీ ఆర్జించిన 223.29 పాయింట్లలో ఒక్క రిలయన్స్‌ షేరువి 73.83 పాయింట్లుకావడం విశేషం.