News

ముంబై:- ఆర్‌బీఐ మానిటరీ పాలసీ ప్రకటన నేపథ్యంలో బ్యాంకింగ్‌ షేర్లలో అమ్మకాలు నెలకొన్నాయి. ఫలితంగా బ్యాంకింగ్‌ షేర్లు నష్టాల బాట పట్టాయి.  అందులో భాగంగా ఎన్‌ఎస్‌ఈలోని ప్రభుత్వరంగ బ్యాంకు సూచి ఇంట్రాడేలో దాదాపు 3శాతం నష్టపోయింది. మధ్యాహ్నం గం.1:30ని.లకు సూచి గత ముగింపు(2,777.80)తో పోలిస్తే దాదాపు 2.75శాతం (71 పాయింట్లు) నష్టంతో 2,706.55 వద్ద ట్రేడింగ్‌ అవుతోంది. ఇదే సమయానికి సూచీలో అత్యధికంగా సెంట్రల్‌ బ్యాంకు 6శాతం నష్టపోయింది. ఇండియన్‌ బ్యాంకు 5శాతం, బ్యాంక్‌ఆఫ్‌బరోడా 4శాతం, ఎస్‌బీఐ బ్యాంకు 3శాతం, కెనరా బ్యాంకు, ఓరియంటల్‌ బ్యాంకు షేర్లు 2శాతం నష్టపోయాయి. వాటితో పాటు  సిండికేట్‌ బ్యాంక్‌, యూనియన్‌ బ్యాంకు 1శాతం క్షీణించగా, బ్యాంక్‌ ఆఫ్‌ ఇండియా, విజయా బ్యాంక్‌, పీఎన్‌బీ షేర్లు అరశాతం నష్టపోయాయి. అయితే ఐడీబీఐ బ్యాంకు షేరు మాత్రం 1.50శాతం లాభాల్లో ట్రేడ్‌ అవుతోంది.
మార్కెట్‌లో సూచీల నష్టాల పరంపర కొనసాగుతూనే ఉంది. మిడ్‌సెషన్‌ సమయానికి సెన్సెక్స్‌ 502 పాయింట్లను కోల్పోయింది. నిఫ్టీ 190 పాయింట్లు నష్టపోయింది. మార్కెట్‌లో నెలకొన్న అమ్మకాల కారణంగా  ఎన్‌ఎస్‌ఈలోని ఫార్మా, ఐటీ, తప్ప మిగిలిన అన్ని రంగాలకు చెందిన సూచీలు నష్టాల్లో ట్రేడ్‌ అవుతున్నాయి. మెటల్‌ సూచి అత్యధికంగా 3శాతం నష్టపోయింది.