News

ముంబై: టాప్‌ 10 అనలిస్టులు ట్రాక్‌ చేస్తున్న 269 కంపెనీల్లో ఏకంగా 168 కంపెనీల ఎర్నింగ్స్‌ అంచనాల్లో సవరణజరిగింది. అంటే దాదాపు 60 శాతం కంపెనీల ఎర్నింగ్స్‌లో వీరు భారీగా కోతలు విధించారు. రూపాయి బలహీనత కారణంగా ఐటీ రంగాన్ని మినహాయించి మిగిలిన అన్ని రంగాల కంపెనీల ఈపీఎస్‌లను తగ్గించారు. 18 కంపెనీల్లో ఏకంగా 50 శాతం వరకు అంచనాలను సవరించారు. అత్యధికంగా టెలికం, సిమెంట్‌, హాస్పటల్‌ రంగాల్లో ఈ విధమైన భారీ కోత ఉన్నట్లు వెల్లడైంది. ఆ వివరాలను ఒకసారి పరిశీలిస్తే..

భారతి ఎయిర్‌టెల్: ధరల ఒత్తిడి కొనసాగుతున్న కారణంగా డిసెంబర్‌ 2018లో సవరించిన ఈపీఎస్‌ అంచనా -3.56 ఉండగా.. ఈ ఏడాది ఏప్రిల్‌లో 7.44 వద్ద ఉంది.
ఫోర్టిస్ హెల్త్‌కేర్: ఆసుపత్రి వ్యాపారంలో సవాళ్లు, డయాగ్నొస్టిక్ యూనిట్ అంతంత మాత్రంగా ఉండడం ఆధారంగా ఈపీఎస్‌ అంచనాలో అనలిస్టులు 97 శాతం కోత విధించారు. 0.1గా తెలిపారు.
హెల్త్‌కేర్ గ్లోబల్: అధిక వడ్డీ వ్యయాలు, విదేశీ మారక ద్రవ్య నష్టాల కారణంగా ఈ ఏడాది తొలి అర్ధభాగంలో నష్టాలను ప్రకటించింది. ఈపీఎస్‌ అంచనా -0.1గా తెలిపారు.
టాటా కమ్యునికేషన్స్: డేటా విభాగం నెమ్మదించిపోవడం, టెలికాం పరిశ్రమలో కన్సాలిడేషన్‌ కారణంగా ఈపీఎస్‌ అంచనా 84.6 శాతం తగ్గి 1.93 వద్ద ఉన్నట్లు విశ్లేషించారు.
ఇంటర్ గ్లోబ్ ఏవియేషన్: తొలి అర్థభాగంలో భారీగా పెరిగిన ముడిచమురు ధరలు, బలహీన పడిన రూపాయి మారకం వల్ల ఈపీఎస్‌ అంచనా 84 శాతం తగ్గి 11.93 వద్ద ఉన్నట్లు విశ్లేషించారు.
సిమెంట్ కంపెనీలు: ముడి పదార్థాల అధిక ధరలు, ఇదే సమయంలో సిమెంట్ ధరలు తక్కువగా ఉండడం నష్టాలకు కారణంగా తెలిపారు.
సద్భావ్ ఇంజనీరింగ్, టాటా మోటార్స్, స్ట్రైడ్స్ ఫార్మా, హెచ్‌టీ మీడియా: తొలి అర్థభాగంలో పనితీరు అంతంత మాత్రంగానే ఉంది. 

ఇక ఈపీఎఫ్‌ అంచనా పెరిగిన కంపెనీల జాబితాలో డీఎల్‌ఎఫ్‌, నాల్కో, డిష్‌టీవీ, స్టీల్‌ కంపెనీలు ఉన్నట్లు తెలిపారు.